کاتژمێر١١ی پێش نیوەڕۆ لە ١ی ئایاری ٢٠٢٢کرێکارانی ژینگەپارێز لەناوپارکی بازاڕ لە ڕانیەگردبونەوە
بەبۆنەی ١ی ئایار جەژنی كرێكارانی جیهان
ئێمە وەك ژینگە پارێزانی ڕاپەڕین ڕایدەگەیەنین لەبری پیرۆز بایی و دڵنەوایی كرێكاران
بەهۆی كۆتایهاتنی تەندەری كۆمپانیاكانی پاككردنەوە و خەمساردی حكومەت لە نوێ كردنەوەی تەندەر لە دەڤەری ڕاپەڕین نزیكەی هەزار كرێكار لە شۆفێر و چاودێر و ژینگە پارێز و كارمەندان بێ كار بوون و چونەتەوە ماڵەوە لە كاتێكدا مووچەی ٦٠ ڕۆژی ڕابردوومان پێنەدراوە ،بەداخەوە لەبری گێڕانی شیرینی و پێدانی گوڵ بە بەرۆكی كرێكاران خەبەری بێكاربوونمان ڕادەگەیەنین.
ودەسەڵاتی حكومڕان بەبەرپرسیار دەزانین كە تا ئەم ساتە وەختە ئایندەی كاركردنمان دیار نیە هەروەها بەم بۆنەیەوە داواكارین بەزوترین كات تەندەری كۆمپانیاكانی پاككردنەوە ڕابگەیندرێت و مافە سەرەتاییەكانی كرێكارانی تێدا دەستەبەر بكرێت كە خۆی لەم چەند خاڵەدا دەبینێتەوە.
١- دەستەبەركردنی تەواوی كارمەندان و ژینگەپارێزان و شۆفێران گەڕاندنەوەی مافە داراییەكان لەكاتی پێویست .
٢– بەرزكردنەوەی مووچەی تەواوی ژینگە پارێزان بەشێوەیەك هاوتا بێت بە كرێكارانی گرێبەستی شارەوانیەكان لە سنووری ئیدارەی ڕاپەڕین.
٣- هەروەها ڕەتكردنەوەی ئەو داوایەی گوایە كرێكاران كەمدەكرێنەوە و بەشێكیان لە تەندەری داهاتوو دەنێردرێنەوە بۆ ماڵەوە تا باری دارایی حكومەت سوك بێت.
٤- دابینكردنی تەواوی پێداویستیە سەرەتاییەكانی ژینگە پارێز بۆ خۆ پارێزی لە نەخۆشی و پیسی .
٥- پێدانی مووچەی كرێكاران لە كاتی خۆیی و بێ دواكەوتن .
هەروەها داواكارین هەر كۆمپانیایەك ئەم تەندەرە وەر دەگرێت ڕەچاوی ئەم خاڵە بنەڕەتیان بكات بۆ جێبەجێكردن هەروەها حكومەت و لایەنە پەیوەندیدارەكان چاودێرێكی چڕی جێبەجێكردنی بكەن تا مافە سەرەتاییەكان جێبەجێ بكرێن.
لەگەڵ ڕێزدا
ژینگە پارێزانی ڕاپەڕین ١ی ئایەری ٢٠٢٢
